A week before...

Naging higit na abala ngayon ang mga AFC volunteers para paghahanda sa nalalapit na anibersaryo ng Galilea at AFC. Ang Galilea ay naitatag noong taong 1997 habang 1992 naman ng maitayo ang samahan ng AFC o Ansan Filipino Community. Sama-sama at tulong-tulong nilang pinaghahandaan ang munting programa na gaganapin sa Choji Bokji Gwan o Choji Welfare Center na matatagpuan sa likod ng Simin Sijang.


Ang mapa patungong Choji Welfare Center na nasa likod ng Simin Sijang. Nasa ikalawang palapag ng gusali ang lugar ng pagtitipon.

Note: Pindutin ang larawan upang higit na makita ang mapa.


Sa hanay ng koro ay buong husay silang nag-eensayo para sa mga bago at magagandang mga awitin. Doble oras ngayon ang kanilang ibinibigay upang higit na mapaganda ang kanilang pag-awit. Tila walang kapaguran naman ang mga cultural member sa kanilang pag-indak bilang paghahanda sa nalalapit na anibersaryo. Nakahanay ngayon sa programa ang ilang folk dance na kanilang itinanghal sa iba't-ibang lugar. Isa na dito ang sayaw na "singkil" kung saan nakamit nila ang 1st prize sa nakaraang 1st Bravo Migrant Contest.
Naging abala rin ang mga opisyal ng AFC sa pagpupulong upang masiguro na walang maging problema ang magagananap pagtitipon.


Ilan sa mga miyembro ng cultural commitee pagkatapos ng pag-eensayo










Magsisilbing tila pista ng baryo ang nasabing selebrasyon sa tulong na rin ng mga iba't-ibang organisasyon na nangakong magbibigay ng ambag na pagkain mula sa kanilang mga miyembro. Higit na magiging makulay ang lugar na pagdadausan ng programa dahil sa gagawing mga palamuti upang higit na magmukhang pista ang pagtitipon.

Editor's copy ng nakatakdang ilabas na issue ng newsletter sa darating na anibersayo.










Tinututukan na rin ng AFC newsletter team ang ilalabas na bagong issue ng newsletter para ngayong anibersaryo. Ang newsletter ay binigyan ng bagong bihis upang higit na magustuhan ng mga mambabasa nito.

Proud to be AFC...Proud to be Pinoy

Nagtungo ang ilang AFC volunteers kasama ang Galilea staff na si Mrs. Maria Park kahapon sa Deoksan Myoon. Sakay ng isang bus kasama na ang ilang mga Pilipina na married sa korean ay umalis ang nasabing grupo bandang 8:30am para magtanghal ng isang munting palabas upang maipakita sa mga taong naroon ang magandang kultura at mga tradisyonal na sayaw ng Pinas. Matapos ang 3 oras na biyahe ay narating nila ang ang maliit na Barrio ng Deoksan Myoon. Ang Deoksan Myoon ay nasa bayan ng Jecheon sa lalawigan ng Chuncheon Bukdo. Bandang alas-dose ay maiinit na sinalubong ng mga organizer ng munting pagtatangahal ang grupo ng AFC.


ang booth ng AFC




masayang pinagsaluhan ng mga AFC at kasama ang masarap na tanghalian














Pagkarating sa lugar ay agad na isinaayos ng mga volunteers at mga kasamang kababayan ang maliit na booth upang maipakita ang larawan, kagamitan at ilang makulay na kasuotan bilang parte ng exhibit na may kaugnayan sa Pilipinas. Pagkatapos ng iang minutong paghihintay ay kanilang pinagsaluhan ang tanghaliang inihanda para sa AFC. Nabusog ang lahat sa masarap na tanghalian.








Isa sa pangunahing layunin ng AFC sa pagdalaw ay para mai-angat ang moral ng mga kababayan nating naroon na may-asawang Koreano. Ayon kasi sa impormasyon na nakarating sa AFC ay mababa diumano ang tingin ng mga Koreano sa mga PIlipinang naroon. Sa munting paraan ay nais tumulong ng AFC upang iangat ang moral ng mga ito. Bilang tugon ay nagpasya ang grupo na ipakilala ang tradisyon at kultura ng Pilipinas upang ipakita na tayo man ay may mayaman at magandang kultura katulad ng Korea.

Sa maliit na lugar sa harap ng palengke inilatag ang telon na nagsilbing stage para sa programa. Alas-dos ng hapon ng magsimula ang programa. Naunang magtanghal ang 2 grupo ng Korean. Kanilang ipinakita sa maliit na bilang ng manood ang tradisyonal na sayaw ng Korea at munting dula-dulaan.

Bandang alas-tres Y medya ng magsimulang magtangahal ang AFC. Nagkaroon ng munting pagpapakilala ang Presidente ng AFC na si Kathlia. Sa tulong ni Mrs. Maria Park bilang interpreter ay kaniyang ipinakilala ang samahan ng AFC ay pakay ng grupo kung bakit sila magtatanghal.

Naunang isalang ang sayaw ng "ARAY" isang tradisyunal na sayaw ng Pilipinas. Sumunod ang "bulaklakan" at "maglalatik". Sa bawat tradisyunal na sayaw ay ipinapaliwanag ni Mrs. Maria Park ang kahulugan at pinagmulan nito. Pagkatapos nito ay isinalang ang 2 modern dance na "heads high" at "duriso".
Nagkaroon naman ng munting workshop o munting pagtuturo ng sayaw sa lahat ng mga naroon sa saliw ng "cha-cha". Ang lahat ay nakilahok sa nasabing workshop na pinamunuan ni Aaron Vergara, isang volunteer ng AFC na Professional Dance Instructor sa Pinas. Kasapi din siya ng isang folk dance troop sa Pinas.
Matapos ang ilang minutong workshop ay ipinakita naman ng grupo ang national dance ng Pinas na "tinikling" bilang pangwakas na bilang.


"Aray"


"Bulaklakan"


"Maglalatik"


"Heads High"


"Tinikling"




Naging masaya at hinangaan ang AFC ng mga taong naroon. Halos lahat ay binati ang AFC sa magandang palabas na idinulot nito. Hindi pa man nakakaalis ang grupo ay muling naimbitahan ang AFC para sa mga susunod na taon. Baon ang ngiti sa labi ay nilisan ng AFC ang lugar bandang alas-singko ng hapon.

Pagod man ay sinulit pa rin ng grupo ang pagkakataon upang makapasyal sa magandang lugar malapit sa Deoksan pagkatapos ng programa. Lulan ng maliit na sasakyang pangdagat na inuupahan ay kanilang binaybay ang magandang lugar. Hindi magkamayaw ang flash ng kanilang mga camera upang mahunan ang magnadang tanawin na naroon.








Tuwang-tuwa ang grupo bagama't pagod ng makarating sa Ansan. Alas-onse Y medya ng maghiwalay ang grupo patungo sa kani-kanilang mga tahanan.

One Happy Sunday

Ganap na katoliko na ang pinakabagong angel ng AFC na Allec Julian ng ito ay mabinyagan kahapon, August 17, 2008 sa Wongok Church. Ang nasabing pagbibinyag ay pinangunahan ni Rev. Fr. Jun Perez. Sumailalim din sa munting seminar na may kinalaman sa pagbibiyag ang mga magulang ni Baby Allec na sina Richard at Evhie Francisco kasama ang mga napiling ninong at ninang ng bata. Matapos ang binyagan at misa ang lahat ng AFC volunteer at malapit na mga kaibigan na mag-asawa ay tumuloy sa Jul Juli buffet para sa munting salu-salo na nagsilbi ring bonding time ng mga AFC.





Naging mainit naman ang pagtanggap ng mga choir member at AFC sa bagong piyanista ng grupo na si Kuya Romeo Balistin. Dahil rin kay Kuya Romeo ay nagkaroon ang choir ng munting vocalization bago gawin ang mga pag-eensayo. Sa ngayon ay abala ang grupo para sa paghahanda sa nalalapit na anibersaryo ng AFC at Galilea sa darating na ika-7 ng Setyembre. Lalo pang humuhusay ang AFC choir dahil sa mga pinagsama-sama puwersa ng mga lider ng nasabing grupo na sina Rachel Pangga, Pris Santos at Elgin Roxas. Idagdag pa dito ang kaalaman sa musika at talento sa pagtugtog nina Ricky Olatan at ang bagong miyembro na si Kuya Romeo. Nakikiisa rin ang mga miyembro ng choir sa mga adhikain ng grupo upang hindi mapabayaan ang AFC choir na minsan ng pinalakas ang pwersa dahil sa mga dating lider nito.


Nagbigay naman ng munting tribute ang AFC para sa feast day ng isang masipag na staff ng Galilea na si Mrs. Maria Park. Ang feast day para sa mga korean ay isa sa mga mahalagang araw para sa kanila. Kaya naman, katulad ng nakaugalian, muling naghandog ng bulaklak at magandang awit ang grupo para kay Mrs. Maria Park. Ang awiting "YOU" ay inalay ng grupo sa pamamagitan ng mahusay na mang-aawit ng choir na si Joy Hagos na nilapatan naman ng magandang musika ng magaling na gitaristang si Ricky.

Annyeong Danny!

Tinanggap ni Danny Sumayo ang plake ng pagkilala para sa kanyang halos tatlong taong pagbibigay serbisyo sa AFC sa pamamagitan ng kanyang munting talento sa pagsasayaw at pagpapaabot ng salita ng diyos bilang liturgy member. Si Danny ay isang aktibong miyembro ng AFC na ibinigay ang mga libreng oras at talento para sa AFC. Dati rin siyang volunteer sa simbahan sa Pinas kaya naman hindi masyadong nahirapan makapag-adjust nang siya ay sumali sa grupo ng AFC. Maraming programa ang kanyang dinaluhan kasama ang mga kapwa dancers ng AFC upang ipakita nag galing ng Pinoy sa pagsasayaw. Ilan lamang dito ay ang hwarang festival, Independence day, Anyang festival at International unity Festival.


"Nagpapasalamat ako sa AFC at sa Diyos sa pagbibigay sa akin na muling makapaglingkod sa simbahan. Dati na po akong volunteer sa simbahan sa Pilipinas at ngayon nga ay dito sa Korea. Naniniwala ako na kahit saan bansa ako mapunta ay muling ibibigay ng Diyos sa akin ang simbahan para makapaglingkod muli. Marami pong salamat!"

Summer Camp '08

Minsan pa ay naging matagumpay ang summer camp na ginanap sa Anmyeondo beach noong August 1-3. Ang Anmyeondo ay 3 oras mula sa Ansan at madalas puntahan ng AFC tuwing summer. Huling linggo pa lamang ng July ng magsimulang mamili ang AFC volunteers ng mga kakailanganin na gamit para sa 2 gabi at 2 araw na paglagi sa nasabing lugar.


July 30, sa e-mart matapos ang unang pamimili










July 31, matapos ang pamimili ng ilan pang pagkain at gamit at agad na nagtungo ang grupo nina Billy, Emil, Roger, Elmer, kasama ang 2 koreano na si Bro. Calixto at Sung Min upang dalhin ang mga ilang gamit sa Anmyeondo. Umalis ang nasabing grupo bandang als-6 ng gabi at nakarating ng alas 9 ng gabi. Agad din naman umuwi matapos ilapag at ayusin ang mga gamit. Nakauwi ang grupo sa Ansan alas-2 ng umaga.



August 01, alas 10 ng umaga. Sina Emsa, Sung Min, Angel kasama si Bro. Calixto patungong Anmyeondo.





Ang unang grupo na pumunta sa Anmyeondo upang pangunahan ang pag-aayos ng lugar,mga pagkain at gamit.










Naging abala ang unang grupo sa pag-aayos ng mga gamit at pagkain maging ang mga room assignment at munting programa. Ang lahat ng gawain ay natapos bago pa man magsidating ang 3 bus na lulan ang mga participants.





Fr. Jun kasama ang ilang AFC volunteers habang inihahanda ang mga pagkain.





Bandang alas-12 na dumating ang 3 bus. Agad na itinuro sa kanila ang mga kwarto na kanilang gagawing pahingahan. Pagkatapos nito ay sinimulan na ang kainan na sinundan ng pagsindi ng bonfire bilang panimula ng munting programa. Sa nasabing programa ay nagkaroon ng maikling sorpresa para kay Sister Maria na nagdiwang ng kanyang ika-46 na taong kaarawan. Iniabot ng AFC ang regalo at cake para kanya. pagkatpos nito ay ang libreng oras upang maka-jamming ang isa't-isa. Walang humpay ang kasiayahn hanggang umaga. Ngunit di naman naging dahilan upang hindi makagising ng maaga para sa agahan at ilan pang sorpresang programa.



Ang bonfire kasama ang ang ilang nagsipagdalo sa summer camp.


Si Ms. Maria kasama si Fr. Kristianus at ialang AFC volunteers habang umaawit ng birthday song.



August 02, maagang nakapagluto ng agahan ang grupo na nakatoka sa nasabing gawain. Nabusog ang lahat sa sopas na nakahain. Bandang alas-10 ng umaga ng magsimula ang munting palaro na nilahukan ng karamihan.






ilan lamang sa mga palaro na nilahukan ng apat na grupo.




Kinagabihan ay muling ipinagpatuloy ang masayang programa bagama't inulan ang grupo ay di pa rin naman naging dahilan ito upang maputol ang kasiyahan. Nagkaroon din ng sayawan na pinangunahan ng AFC volunteers at ilan participants.

August 03, nagkaroon ng banal na misa bandang als-930 ng umaga na pinangunahan ni Fr. Kristianus kasama si Fr. Kennedy at isa pang indonesian priest.



Fr. Kristianus at ang mga nagsipag-attend ng misa.



Matapos ang misa ay muling tinungo ng grupo ang dagat upang muling magbabad sa tubig bago umuwi. Pagkatapos naman ng tanghalian na inihanda ng grupo ng mga Kabitenyo ay isa-isa ng naghanda ang mga participants para lisanin ang Anmyeondo pabalik ng Ansan.


Bagama't nagkaroon ng ilang problema ay naging matagumpay pa rin ang summer camp 2008 dahil na rin sa pakikiisa ng mga volunteers lalo na ng mga nagsipagdalo. Nanganghulugan lamang na lahat ay magiging maayos kung lahat ay nagtutulungan at nakikiisa sa mga adhikain. Kaya naman mula sa mga volunteers, lahat kami ay nagpapasalamat sa inyong pag-intindi at pakikiisa. Samahan ninyo muli kami sa susunod nating programa.